Veterinariya faoliyatini litsenziyalash bo‘yicha davlat xizmatlarini ko‘rsatishning ma’muriy reglamentini tasdiqlash to‘g‘risida

O‘zbekiston Respublikasining “Faoliyatning ayrim turlarini litsenziyalash to‘g‘risida”gi Qonuniga va O‘zbekiston Respublikasi Prezidentining “Davlat xizmatlari ko‘rsatish milliy tizimini jadal rivojlantirish bo‘yicha qo‘shimcha chora-tadbirlar to‘g‘risida” 2020-yil 31-yanvardagi PF-5930-son Farmoniga muvofiq Vazirlar Mahkamasi qaror qiladi:

           1. Veterinariya faoliyatini litsenziyalash bo‘yicha davlat xizmatlarini ko‘rsatishning ma’muriy reglamenti 1-ilovaga muvofiq tasdiqlansin.

2. Ushbu qaror bilan tasdiqlangan ma’muriy reglamentga muvofiq yuridik va jismoniy shaxslar ko‘rsatiladigan davlat xizmatlaridan foydalanish uchun faqat davlat xizmatlari markazlari yoki O‘zbekiston Respublikasi Yagona interaktiv davlat xizmatlari portali (keyingi o‘rinlarda — YIDXP) orqali murojaat qiladi.

3. O‘zbekiston Respublikasi Veterinariya va chorvachilikni rivojlantirish davlat qo‘mitasi 2020-yil 1-avgustga qadar:

davlat xizmatlarini ko‘rsatish uchun zarur hujjatlar va boshqa hujjatlarning namunaviy shakllari, blankalari ishlab chiqilishini hamda O‘zbekiston Respublikasi Adliya vazirligi huzuridagi Davlat xizmatlari agentligi bilan kelishgan holda tasdiqlanishini;

O‘zbekiston Respublikasi Adliya vazirligi huzuridagi Davlat xizmatlari agentligi bilan birgalikda Davlat xizmatlari markazlarining xodimlari ishtirokida ushbu qaror bilan tasdiqlangan ma’muriy reglamentni amalda qo‘llashning samaradorligi va natijadorligi darajasini oshirishga yo‘naltirilgan o‘quv-seminarlar tashkil etilishi va o‘tkazilishini ta’minlasin. 

4. O‘zbekiston Respublikasi Veterinariya va chorvachilikni rivojlantirish davlat qo‘mitasi Axborot texnologiyalari va kommunikatsiyalarini rivojlantirish vazirligi bilan birgalikda 2020-yil 1-sentabrga qadar bo‘lgan muddatda:

mazkur qaror bilan tasdiqlangan ma’muriy reglamentga muvofiq davlat xizmatlarining YIDXP orqali joriy etilishini ta’minlasin;

YIDXPda davlat xizmatlari ko‘rsatilishining har bir bosqichida murojaatlar ko‘rib chiqilishini kuzatib borish tartibini joriy etsin.

5. O‘zbekiston Respublikasi Veterinariya va chorvachilikni rivojlantirish davlat qo‘mitasi Axborot texnologiyalari va kommunikatsiyalarini rivojlantirish vazirligi bilan birgalikda budjetdan tashqari mablag‘lar, grant va qonun hujjatlari bilan taqiqlanmagan boshqa mablag‘lar hisobidan davlat xizmatlarini ko‘rsatish uchun elektron hujjat almashishni ta’minlovchi “VIS-LICENSE” axborot tizimini uch oy muddatda ishlab chiqsin.

6. O‘zbekiston Respublikasi Veterinariya va chorvachilikni rivojlantirish davlat qo‘mitasi bugungi kunda faoliyat yuritayotgan litsenziatlar to‘g‘risidagi ma’lumotlarni 2020-yil 30-dekabrga qadar “VIS-LICENSE” axborot tizimiga kiritish choralarini ko‘rsin.

7. O‘zbekiston Respublikasi Hukumatining 2-ilovaga muvofiq ayrim qarorlari o‘z kuchini yo‘qotgan deb hisoblansin.

8. O‘zbekiston Respublikasi Veterinariya va chorvachilikni rivojlantirish davlat qo‘mitasi manfaatdor vazirlik va idoralar bilan birgalikda o‘zlari qabul qilgan normativ-huquqiy hujjatlarni bir oy muddatda ushbu qarorga muvofiqlashtirsin.

9. Ushbu qarorning 1, 2 va 7-bandlari 2020-yil 1-sentabrdan boshlab kuchga kiradi.

10. Mazkur qarorning bajarilishini nazorat qilish O‘zbekiston Respublikasi Bosh vazirining agrar va oziq-ovqat sohalarini rivojlantirish masalalari bo‘yicha o‘rinbosari O‘.I. Barnoyev hamda O‘zbekiston Respublikasi Veterinariya va chorvachilikni rivojlantirish davlat qo‘mitasi raisi B.T. Norqobilov zimmasiga yuklansin.

O‘zbekiston Respublikasining Bosh vaziri A. ARIPOV

Toshkent sh.,

2020-yil 23-may,

328-son

Vazirlar Mahkamasining 2020-yil 23-maydagi 328-son qaroriga
 1-ILOVA

1.02.00.00.00 Davlat boshqaruvi asoslari / 02.08.00.00 Iqtisodiyot, ijtimoiy-madaniy qurilish sohasidagi davlat boshqaruvining umumiy masalalari / 02.08.06.00 Ma’muriy tartib-taomillar / 02.08.06.04 Davlat xizmatlarini ko‘rsatish;

2.09.00.00.00 Tadbirkorlik va xo‘jalik faoliyati / 09.01.00.00 Tadbirkorlik to‘g‘risidagi qonunchilik / 09.01.05.02 Faoliyatning ayrim turlarini litsenziyalash tartibi / 09.01.06.00 Faoliyatning ayrim turlarini litsenziyalash. Ruxsat berish (shuningdek, 02.08.06.00ga qarang)]

Veterinariya faoliyatini litsenziyalash bo‘yicha davlat xizmatlarini ko‘rsatishning

MA’MURIY REGLAMENTI

1-bob. Umumiy qoidalar

1. Mazkur Reglament jismoniy va yuridik shaxslarga veterinariya faoliyatini litsenziyalash, litsenziyaning amal qilishini to‘xtatish, tugatish, bekor qilish, qayta rasmiylashtirishda davlat xizmatlarini (keyingi o‘rinlarda — davlat xizmatlari) ko‘rsatish tartibini belgilaydi.

2. Ushbu Reglamentda quyidagi asosiy tushunchalardan foydalaniladi:

veterinariya faoliyatning litsenziyalanayotgan yo‘nalishlari — O‘zbekiston Respublikasi hududida amalga oshirilishi uchun litsenziya olish talab qilinadigan yo‘nalishlari, shuningdek, ularning bir qismi (qismlari):

veterinariya laboratoriya-diagnostika ishlari;

veterinariya preparatlari, shu jumladan veterinariya maqsadlari uchun dorivor vositalar, ozuqa qo‘shimchalari, biologik preparatlar va zoogigiyena vositalarini ishlab chiqarish va tayyorlash;

veterinariya preparatlari, shu jumladan veterinariya maqsadlari uchun biologik preparatlarni sotish;

veterinariya davolash-profilaktika ishlari;

veterinariya preparatlari, shu jumladan veterinariya maqsadlari uchun dorivor vositalar, ozuqa qo‘shimchalari va zoogigiyena vositalarini sotish; 

litsenziyalash — litsenziya berish to‘g‘risidagi arizani topshirish va ko‘rib chiqish, litsenziyaning amal qilishini to‘xtatib turish yoki tugatish, shuningdek uni bekor qilish va qayta rasmiylashtirish jarayoni bilan bog‘liq tadbirlar kompleksi;

litsenziya talablari va shartlari — veterinariya faoliyatning litsenziyalanayotgan yo‘nalishlarini, shuningdek, ularning bir qismini (qismlarini) amalga oshirayotganda litsenziat tomonidan bajarilishi majburiy bo‘lgan, qonun hujjatlarida belgilangan talablar va shartlarning majmui;

litsenziyalovchi organ — veterinariya faoliyatning yo‘nalishlarining, shuningdek, ularning bir qismining (qismlarining) tegishliligi bo‘yicha O‘zbekiston Respublikasi Veterinariya va chorvachilikni rivojlantirish davlat qo‘mitasi, Qoraqalpog‘iston Respublikasi Veterinariya va chorvachilikni rivojlantirish qo‘mitasi, viloyatlar va Toshkent shahri veterinariya va chorvachilikni rivojlantirish boshqarmalari;

litsenziya talabgori — litsenziyalovchi organga veterinariya faoliyatning litsenziyalanadigan yo‘nalishlarini, shuningdek, ularning bir qismini (qismlarini) amalga oshirish uchun litsenziya berish to‘g‘risidagi ariza bilan murojaat etgan yuridik yoki jismoniy shaxs — O‘zbekiston Respublikasi rezidenti;

litsenziat — veterinariya faoliyatning litsenziyalanadigan yo‘nalishlarini, shuningdek, ularning bir qismini (qismlarini) amalga oshirishga litsenziyasi bo‘lgan yuridik yoki jismoniy shaxs;

litsenziya reyestri — berilgan, to‘xtatib turilgan, qayta tiklangan, qayta rasmiylashtirilgan, bekor qilingan litsenziyalar, shuningdek amal qilishi tugatilgan litsenziyalar to‘g‘risidagi ma’lumotlarni o‘z ichiga olgan litsenziyalovchi organning ma’lumotlar bazalari;

litsenziya — litsenziyalovchi organ, shuningdek, Davlat xizmatlari markazi yoki O‘zbekiston Respublikasi Yagona interaktiv davlat xizmatlari portali tomonidan berilgan litsenziya talablari va shartlariga so‘zsiz rioya etgan holda veterinariya faoliyatning yo‘nalishlarini, shuningdek, ularning bir qismini (qismlarini) amalga oshirish uchun ruxsatnoma (huquq).

3. Davlat xizmatlari markazi (keyingi o‘rinlarda — Markaz) yoki O‘zbekiston Respublikasi Yagona interaktiv davlat xizmatlari portali (keyingi o‘rinlarda — YIDXP) orqali O‘zbekiston Respublikasi Veterinariya va chorvachilikni rivojlantirish davlat qo‘mitasi (keyingi o‘rinlarda — Qo‘mita), Qoraqalpog‘iston Respublikasi Veterinariya va chorvachilikni rivojlantirish qo‘mitasi, viloyatlar va Toshkent shahri veterinariya va chorvachilikni rivojlantirish boshqarmalari (keyingi o‘rinlarda — hududiy boshqarmalar) tomonidan quyidagi yo‘nalishlar litsenziyalanadi: 

a) Qo‘mita tomonidan:

veterinariya laboratoriya-diagnostika ishlari;

veterinariya preparatlari, shu jumladan veterinariya maqsadlari uchun dorivor vositalar, ozuqa qo‘shimchalari, biologik preparatlar va zoogigiyena vositalarini ishlab chiqarish va tayyorlash;

veterinariya preparatlari, shu jumladan veterinariya maqsadlari uchun biologik preparatlarni sotish;

b) hududiy boshqarmalar tomonidan:

veterinariya davolash-profilaktika ishlari;

veterinariya preparatlari, shu jumladan veterinariya maqsadlari uchun dorivor vositalar, ozuqa qo‘shimchalari va zoogigiyena vositalarini sotish. 

Litsenziyalar berish to‘g‘risidagi hujjatlarni ko‘rib chiqish, ular yuzasidan xulosa tayyorlash uchun litsenziyalovchi organ hududiy boshqarmalar hamda tuman (shahar) veterinariya va chorvachilikni rivojlantirish bo‘limlarining rahbar va xodimlarini ekspert sifatida (keyingi o‘rinlarda — ekspert) jalb qiladi.

4. Litsenziyalovchi organ faoliyatini muvofiqlashtirish, litsenziyalash tartibini takomillashtirish bo‘yicha takliflar tayyorlash, litsenziyalovchi organ beradigan litsenziyalar to‘g‘risidagi ma’lumotlarni “Litsenziya” axborot tizimlari kompleksiga kiritib borish, litsenziyalovchi organ tomonidan faoliyat yo‘nalishlarini litsenziyalash sohasidagi qonun hujjatlariga rioya etilishini nazorat qilish Qo‘mita tomonidan amalga oshiriladi.

5. Markaz va litsenziyalovchi organ o‘rtasidagi axborot almashinuvi elektron raqamli imzoni (keyingi o‘rinlarda — ERI) majburiy tartibda qo‘llash orqali faqat idoralararo o‘zaro elektron bog‘lanish yordamida ko‘rsatiladi.

6. Veterinariya faoliyatini amalga oshirish huquqini beruvchi litsenziya cheklanmagan muddatga beriladi.

7. Litsenziat tomonidan veterinariya faoliyati faqat litsenziyada ko‘rsatilgan yo‘nalishlari, shuningdek, ularning bir qismi (qismlari) bo‘yicha amalga oshirilishi mumkin.

Yuridik shaxs tomonidan filiallar tashkil etilganida, litsenziya talabgorining QR-kodi (matrik shtrixli kod) saqlangan holda filialning faoliyat yo‘nalishi va manzili haqidagi ma’lumotlar qo‘shimcha ravishda kiritiladi. Filiallar tashkil etilganda, mazkur Reglamentga 3-ilovaga muvofiq Markaz yoki YIDXP orqali ariza berishi shart.

8. Davlat xizmatlari mazkur Reglamentga 1-ilovaga muvofiq sxema asosida ko‘rsatiladi.

2-bob. Litsenziya talablari va shartlari

9. Quyidagilar veterinariya faoliyatini amalga oshirishda litsenziya talablari va shartlari hisoblanadi:

veterinariya faoliyati sohasidagi qonun hujjatlariga va texnik jihatdan tartibga soluvchi hujjatlar talablariga rioya etish;

litsenziatning faoliyatni amalga oshirishda fuqarolarning huquqlari va qonuniy manfaatlariga, sog‘lig‘iga, jamoat xavfsizligiga zarar yetkazishning oldini olishga qaratilgan qonun hujjatlariga rioya etishi;

veterinariya yo‘nalishi bo‘yicha o‘rta-maxsus ma’lumotga va yuridik shaxs maqomiga ega bo‘lgan subyektlar shtatidagi xodimlar hamda yakka tartibdagi tadbirkorlar faqat veterinariya preparatlari, shu jumladan veterinariya maqsadlari uchun dorivor vositalar, ozuqa qo‘shimchalari va zoogigiyena vositalarini sotishi;

yuridik shaxs shtatida oliy yoki o‘rta maxsus ma’lumotga va veterinariya sohasida maxsus tayyorgarlikka ega bo‘lgan veterinariya mutaxassislarining mavjud bo‘lishi;

yakka tartibdagi tadbirkorning oliy yoki o‘rta maxsus veterinariya ma’lumotiga va veterinariya sohasida maxsus tayyorgarlikka ega bo‘lishi;

yuridik shaxs xodimlarining, veterinariya faoliyatini amalga oshiruvchi yakka tartibdagi tadbirkorlarning kamida 5 yilda bir marta malaka oshirishi;

litsenziya talabgori yoki litsenziat veterinariya faoliyatini amalga oshirish uchun unga mulk huquqi bilan yoki boshqa qonuniy asosda tegishli veterinariya normalari va qoidalariga muvofiq binolarga yoki xonalarga ega bo‘lishi;

veterinariya normalari va qoidalariga rioya etish;

O‘zbekiston Respublikasida ruxsat berilgan diagnostika, profilaktika va davolash usullarini, shuningdek, veterinariya preparatlarini qo‘llash;

litsenziya talabgori — yuridik shaxs tomonidan litsenziyalovchi organga veterinariya mutaxassisining ishga olinganligi to‘g‘risidagi ma’lumotlarni Markaz yoki YIDXP orqali mutaxassis ishga olingan kundan boshlab 10 kun mobaynida taqdim etish.

10. Veterinariya faoliyatining tegishli yo‘nalishlarini amalga oshirish uchun zarur bo‘lgan moddiy-texnik bazaga va boshqa texnika vositalariga qo‘yiladigan eng kam talablar belgilangan tartibda litsenziyalovchi organ tomonidan belgilanadi.

3-bob. Davlat xizmatlarini ko‘rsatish tartibi

11. Litsenziya talabgori davlat xizmatlaridan foydalanish uchun Markazga o‘zi kelib murojaat etadi yoki davlat xizmatlaridan elektron tarzda foydalanish uchun YIDXPda ro‘yxatdan o‘tadi.

12. Litsenziya talabgori o‘zi kelib murojaat etgan taqdirda, Markaz xodimi ariza beruvchi nomidan, YIDXP orqali murojaat etgan taqdirda esa mustaqil tarzda ushbu Reglamentga 2-ilovaga muvofiq shakldagi arizani elektron ravishda to‘ldiradi.

Arizaga yakka tartibdagi tadbirkorlar veterinariya mutaxassisligi bo‘yicha oliy yoki o‘rta maxsus ma’lumoti to‘g‘risidagi diplomidan yoki uning ko‘chirmasidan nusxa ham ilova qiladi.

13. Litsenziya talabgori yoki litsenziat Markaz yoki YIDXPdagi tegishli shakllardagi arizaga va uning talablariga muvofiq murojaat qiladi.

14. Litsenziya talabgori tegishli shakldagi ariza to‘ldirilgandan so‘ng ma’lumotlarning to‘g‘riligini tekshirib, arizani o‘z elektron raqamli imzosi (ERI) bilan tasdiqlaydi.

O‘zi kelib murojaat etgan taqdirda, arizani (ERI) bilan tasdiqlash imkoniyati bo‘lmagan hollarda tegishli imzolar identifikatsiya qilishning boshqa vositalari (daktiloskopiya, elektron imzo va boshqalar) bilan ham tasdiqlanishi mumkin.

15. Markaz yoki YIDXP ko‘rsatiladigan davlat xizmatlari uchun Reglament talablariga muvofiq yig‘im yoki davlat bojlarini taqsimlab, ularning undirilishini ta’minlaydi.

16. Vazirlar Mahkamasining 2000-yil 20-dekabrdagi 488-son qarori bilan tasdiqlangan Litsenziyalar blankalarini tayyorlash tartibi to‘g‘risidagi nizomga asosan berilgan litsenziyani qayta rasmiylashtirish uchun Markazga qaytaradi.

Ushbu litsenziyani Markaz ariza qabul qilingan kunda veterinariya faoliyatining yo‘nalishi bo‘yicha tegishli litsenziyalovchi organga yuboradi.

17. Markaz qonun hujjatlarida belgilangan tartibda yuridik shaxs tugatilganda, shuningdek, yakka tartibdagi tadbirkorni davlat ro‘yxatidan o‘tganligi to‘g‘risidagi guvohnomaning amal qilishi tugatilganda, litsenziyaning amal qilishini tugatish uchun veterinariya faoliyati yo‘nalishining tegishliligi bo‘yicha litsenziyani litsenziyalovchi organga yuboradi yoki uni xabardor qiladi.

18. Litsenziya berishni rad etish to‘g‘risidagi bildirishnomada ko‘rsatilgan muddat ichida arizalar qayta ko‘rib chiqilganligi uchun yig‘im undirilmaydi, bildirishnomada ko‘rsatilgan muddat o‘tgandan keyin berilgan ariza yangidan berilgan ariza hisoblanadi.

19. Arizada noto‘g‘ri yoki to‘liq bo‘lmagan ma’lumotlar ko‘rsatilishi, shuningdek, litsenziya olish uchun Reglamentda belgilangan yig‘imni yoki davlat bojini to‘lamaslik davlat xizmati ko‘rsatishni rad etish uchun asos hisoblanadi.

Davlat xizmatlarini ko‘rsatishni boshqa asoslar bo‘yicha rad etish qat’iy taqiqlanadi.

20. Litsenziya talabgori davlat xizmatlaridan foydalanishdan ularni ko‘rsatishning har qanday bosqichida bosh tortish huquqiga ega.

21. Litsenziya talabgori Markaz yoki YIDXP orqali yuborgan tegishli shakldagi arizadan voz kechganda, uning arizasi ko‘rilmasdan qoldiriladi. Bunda to‘langan yig‘im qaytarilmaydi.

4-bob. Litsenziya olish va uni qayta rasmiylashtirishda zarur bo‘lgan hujjatlar

22. Litsenziya olish uchun litsenziya talabgori litsenziyalovchi organga quyidagi hujjatlarni taqdim etadi:

a) 2-ilovaga muvofiq litsenziya berish to‘g‘risidagi ariza, unda quyidagilar ko‘rsatiladi:

yuridik shaxs uchun — yuridik shaxsning nomi va tashkiliy-huquqiy shakli, joylashgan joyi (pochta manzili), bank muassasasining nomi va bank muassasasidagi hisobvarag‘i;

jismoniy shaxs uchun — familiyasi, ismi, otasining ismi, fuqaroning shaxsini tasdiqlovchi hujjatga oid ma’lumotlar;

shuningdek, telefon raqamlari hamda faoliyatni amalga oshirish (filiallar) manzillari;

yuridik yoki jismoniy shaxs amalga oshirishni mo‘ljallayotgan faoliyat yo‘nalishlari;

b) tegishli yakka tartibdagi tadbirkorning diplomidan yoki uning ko‘chirmasidan nusxa.

23. Litsenziya talabgoridan mazkur Reglamentda nazarda tutilmagan hujjatlarni taqdim etishni talab qilishga yo‘l qo‘yilmaydi.

5-bob. Arizani ko‘rib chiqish va litsenziya berish yoki litsenziya berishni rad etish to‘g‘risida qaror qabul qilish

24. Ariza ko‘rib chiqilganligi uchun litsenziya talabgoridan qonun hujjatlarida belgilangan bazaviy hisoblash miqdorining bir baravari miqdorida yig‘im undiriladi.

To‘lanadigan yig‘im summasining:

a) Markazga o‘zi kelib murojaat etganda:

20 foizi — O‘zbekiston Respublikasi Adliya vazirligi huzuridagi Davlat xizmatlari agentligi budjetdan tashqari jamg‘armasining shaxsiy hisobvarag‘iga;

qolgan mablag‘lar litsenziyalovchi organning hisobvarag‘iga;

b) YIDXP orqali murojaat etilganda:

10 foizi — O‘zbekiston Respublikasi Adliya vazirligi huzuridagi Davlat xizmatlari agentligi budjetdan tashqari jamg‘armasining shaxsiy hisobvarag‘iga;

11,25 foizi — Axborot-kommunikatsiya texnologiyalarini rivojlantirish jamg‘armasining elektron hukumat va raqamli iqtisodiyotning idoralararo loyihalarini moliyalashtirish bo‘yicha maxsus hisobvarag‘iga;

qolgan mablag‘lar litsenziyalovchi organning hisobvarag‘iga o‘tkaziladi.

25. Litsenziya berish yoki litsenziya berishni rad etish to‘g‘risida qaror ariza va barcha zarur hujjatlar Markaz yoki YIDXPdan kelgan kundan boshlab o‘n kundan ortiq bo‘lmagan muddatda qabul qilinadi.

26. Litsenziya talabgori Markazga kelib murojaat etganda, uning arizasi Markaz xodimi tomonidan to‘ldirilib, litsenziya talabgori tomonidan tasdiqlangandan so‘ng barcha hujjatlar 10 daqiqa mobaynida vakolatli organga elektron shaklda yuboriladi. YIDXP orqali murojaat qilinganda esa, so‘rovnoma avtomatik tarzda vakolatli organga yuboriladi. Vakolatli organ barcha zarur hujjatlar ilova qilingan arizani ariza kelib tushgan kunda ko‘rib chiqish uchun ekspertga yuboradi.

Ekspert bir hafta muddatda taqdim etilgan hujjatlarni ko‘rib chiqadi va ular bo‘yicha litsenziya berish yoki litsenziya berishni rad etish to‘g‘risida ekspert xulosasi tayyorlaydi.

Litsenziyalovchi organ uch kun muddatda ekspert xulosasi asosida litsenziya berish yoki litsenziya berishni rad etish to‘g‘risida qaror qabul qiladi.

Litsenziya talabgorining litsenziya talablari va shartlariga muvofiqligini aniqlash uchun litsenziyalovchi organ ekspert iltimosiga ko‘ra o‘z mablag‘lari hisobidan:

litsenziya talabgorida litsenziyalanadigan faoliyat yo‘nalishini amalga oshirish uchun mavjud sharoitlarni joylarga chiqib baholash;

tegishli xulosalar tayyorlash uchun shartnoma asosida ekspertlarni jalb qilish huquqiga ega.

27. Litsenziyalovchi organ tegishli qaror qabul qilingandan so‘ng litsenziya talabgorini qabul qilingan qaror to‘g‘risida yozma ravishda Markaz yoki YIDXP orqali xabardor qiladi.

Litsenziya berish uchun qaror qilinganligi to‘g‘risidagi bildirishnoma litsenziya talabgoriga bank hisobvarag‘i rekvizitlari, davlat boji to‘lash muddati ko‘rsatilib, yozma shaklda hamda litsenziya bitimini ilova qilgan holda imzolash uchun Markaz yoki YIDXP orqali yuboriladi.

28. Litsenziya litsenziya talabgori davlat boji to‘langanligini tasdiqlovchi hujjat va imzolangan litsenziya bitimi Markaz yoki YIDXP orqali taqdim etilgandan so‘ng beriladi.

Agar Yagona billing tizimi orqali davlat boji to‘langan bo‘lsa, faqat imzolangan litsenziya bitimi Markaz yoki YIDXP orqali taqdim etiladi hamda litsenziya ushbu bandning birinchi xatboshidagi muddatda beriladi.

Litsenziyada quyidagilar ko‘rsatiladi:

litsenziyaning tartib raqami;

berilgan vaqti;

litsenziya egasi;

yuridik shaxs uchun — nomi va tashkiliy-huquqiy shakli;

jismoniy shaxs uchun — familiyasi, ismi va otasining ismi;

litsenziya egasining joylashgan joyi;

yuridik shaxs uchun — joylashgan joyi (pochta manzili), uning soliq to‘lovchi identifikatsiya raqami;

faoliyatni amalga oshirish manzili;

filial manzillari;

jismoniy shaxs uchun — turar joyi, uning soliq to‘lovchi identifikatsiya raqami;

faoliyatni amalga oshirish manzili;

ruxsat etilgan faoliyat yo‘nalishi; 

ruxsat etilgan filialdagi faoliyat yo‘nalishi; 

litsenziyani bergan litsenziyalovchi organ; 

litsenziyaning reyestr bo‘yicha tartib raqami. 

29. Veterinariya faoliyatini amalga oshirish uchun litsenziya talabgorining litsenziya olishi va undan foydalanishi to‘g‘risida litsenziyalovchi organ bilan litsenziya talabgori o‘rtasidagi munosabatlarni tartibga soladigan litsenziya bitimi tuziladi va litsenziyalovchi organ hamda litsenziat tomonidan elektron imzosi bilan imzolanadi.

Litsenziya bitimida quyidagilar bo‘lishi kerak:

bitimni imzolagan shaxslarning familiyasi, ismi, otasining ismi, egallab turgan lavozimi;

tomonlarning rekvizitlari;

amalga oshirilishiga litsenziya berilayotgan veterinariya faoliyati yo‘nalishlarining nomi;

litsenziya talabgoriga qo‘yiladigan litsenziya talablari va shartlari;

litsenziyalanadigan faoliyat yo‘nalishi amalga oshiriladigan manzil (manzillar);

litsenziya bitimi talablari va shartlari buzilganligi uchun tomonlarning javobgarligi;

litsenziya talabgorining litsenziya bitimi talablari va shartlarini bajarishini litsenziyalovchi organ tomonidan nazorat qilish tartibi;

veterinariya faoliyatining muayyan yo‘nalishini amalga oshirish xususiyatlariga taalluqli boshqa shartlar.

Litsenziya qayta rasmiylashtirilgan taqdirda, litsenziya bitimiga o‘zgartirish yoki qo‘shimchalar kiritiladi yoxud yangi litsenziya bitimi tuziladi.

30. Agar litsenziya talabgori litsenziya berish to‘g‘risida qaror qabul qilinganligi haqidagi bildirishnoma Markaz yoki YIDXP orqali yuborilgan vaqtdan boshlab uch oy mobaynida litsenziyalovchi organga litsenziya berilganligi uchun davlat boji to‘langanligini tasdiqlovchi hujjatni va imzolangan litsenziya bitimini Markaz yoki YIDXP orqali taqdim etmasa, litsenziyalovchi organ litsenziyani bekor qilish to‘g‘risida qaror qabul qilishga haqlidir.

Agarda litsenziya talabgori Yagona billing tizimi orqali davlat bojini to‘lamasa, ushbu bandning birinchi xatboshidagi muddatda litsenziyalovchi organ litsenziyani bekor qilish to‘g‘risida qaror qabul qilishga haqlidir.

31. Litsenziya berish “Faoliyatning ayrim turlarini litsenziyalash to‘g‘risida” O‘zbekiston Respublikasi Qonunining 17-moddasida nazarda tutilgan asoslar bo‘yicha rad etilishi mumkin.

Litsenziya talabgori litsenziyalovchi organning litsenziya berishni rad etilishi to‘g‘risidagi qarori, shuningdek, litsenziyalovchi organ mansabdor shaxsining xatti-harakati (harakatsizligi) yuzasidan qonun hujjatlarida belgilangan tartibda shikoyat qilish huquqiga egadir.

32. Litsenziya berish rad etilishi to‘g‘risida qaror qabul qilingan taqdirda, rad etish to‘g‘risidagi bildirishnoma litsenziya talabgoriga rad etishning aniq sabablari va litsenziya talabgori ko‘rsatib o‘tilgan sabablarni bartaraf etib, hujjatlarni takroran ko‘rib chiqishga taqdim etishi uchun yetarli bo‘lgan muddat ko‘rsatilgan holda yozma shaklda Markaz yoki YIDXP orqali yuboriladi. Litsenziya berishni rad etish haqidagi bildirishnomada ko‘rsatilgan muddat kamchiliklarni bartaraf etish uchun zarur bo‘lgan vaqtga mutanosib bo‘lishi kerak.

Litsenziya talabgori tomonidan litsenziya berish rad etilishiga asos bo‘lgan sabablar bartaraf etilgan taqdirda, hujjatlar litsenziya talabgorining arizasi barcha zarur hujjatlar bilan birgalikda Markaz yoki YIDXP orqali olingan kundan boshlab o‘n kundan ortiq bo‘lmagan muddatda takroran ko‘rib chiqiladi.

Bunda takroran taqdim etilgan hujjatlar ular qabul qilingan kunda ko‘rib chiqish uchun ekspertga yuboriladi.

Ekspert taqdim etilgan hujjatlarni olti kundan ortiq bo‘lmagan muddatda ko‘rib chiqadi va ular yuzasidan litsenziya berish yoki litsenziya berishni rad etish to‘g‘risida ekspert xulosasi tayyorlaydi.

Litsenziyalovchi organ ekspert xulosasi asosida to‘rt kun muddatda litsenziya berish yoki litsenziya berishni rad etish to‘g‘risida qaror qabul qiladi.

Litsenziya talabgorining arizasi qayta ko‘rib chiqilganligi uchun yig‘im undirilmaydi.

Litsenziya talabgorining arizasini qayta ko‘rib chiqishda ilgari litsenziya berishni rad etish to‘g‘risidagi bildirishnomada ko‘rsatilmagan yangi asoslar bo‘yicha litsenziya berishni rad etishga yo‘l qo‘yilmaydi.

Litsenziya berishni rad etish to‘g‘risidagi bildirishnomada ko‘rsatilgan muddat o‘tgandan keyin Markaz yoki YIDXP orqali berilgan ariza yangidan berilgan ariza hisoblanadi.

6-bob. Litsenziyalarni qayta rasmiylashtirish

33. Yuridik shaxs — litsenziat o‘zgarganda, uning nomi yoki joylashgan joyi (pochta manzili) o‘zgargan taqdirda, litsenziya talabgori qayta ro‘yxatdan o‘tkazilgandan keyin bir oy muddatda litsenziyalovchi organga ko‘rsatib o‘tilgan ma’lumotlarni tasdiqlovchi tegishli hujjatlarni ilova qilingan holda, litsenziyani qayta rasmiylashtirish to‘g‘risida 4-ilovaga muvofiq Markaz yoki YIDXP orqali ariza berishi shart.

Jismoniy shaxs — litsenziatning familiyasi, ismi, otasining ismi yoki yashash joyi o‘zgargan taqdirda, litsenziat qayta ro‘yxatdan o‘tkazilgandan keyin bir oy muddatda litsenziyalovchi organga ko‘rsatib o‘tilgan ma’lumotlarni tasdiqlovchi tegishli hujjatlar ilova qilingan holda, litsenziyani qayta rasmiylashtirish to‘g‘risida 5-ilovaga muvofiq Markaz yoki YIDXP orqali ariza berishi shart.

Yangidan vujudga kelgan yuridik shaxsni davlat ro‘yxatidan o‘tkazish sanasida veterinariya faoliyatini amalga oshirish huquqini beruvchi litsenziyaga ega bo‘lgan litsenziatlar qo‘shib yuborilgan taqdirda, litsenziyani ushbu bandning birinchi xatboshida nazarda tutilgan tartibda qayta rasmiylashtirishga yo‘l qo‘yiladi.

34. Litsenziat litsenziya qayta rasmiylashtirilgunga qadar unda ko‘rsatilgan faoliyatni ilgari berilgan litsenziya asosida amalga oshiradi.

Litsenziyaning amal qilishi litsenziyalanadigan faoliyat yo‘nalishning bir qismi (qismlari) uchun to‘xtatilgan taqdirda, litsenziya qayta rasmiylashtiriladi.

35. Litsenziyani qayta rasmiylashtirishda litsenziyalovchi organ litsenziyalar reyestriga tegishli o‘zgartirishlar kiritadi. Litsenziya tegishli hujjatlar ilova qilingan litsenziyani qayta rasmiylashtirish to‘g‘risidagi ariza 6-ilovaga muvofiq Markaz yoki YIDXP orqali olingan kundan yoki litsenziyaning amal qilishini litsenziyalanadigan faoliyat turining bir qismi (qismlari) uchun to‘xtatish to‘g‘risida qaror qabul qilingan kundan boshlab besh kun mobaynida litsenziyalovchi organ tomonidan qayta rasmiylashtiriladi.

Litsenziyani qayta rasmiylashtirishda litsenziya talabgorining litsenziya berish to‘g‘risidagi arizasi ko‘rib chiqilganligi uchun to‘lanadigan summaning yarmi miqdorida yig‘im undiriladi.

36. Qayta rasmiylashtirishda oldin berilgan litsenziyalarda ko‘rsatilgan yo‘nalishlar bo‘yicha vakolatli litsenziyalovchi organga Markaz yoki YIDXP orqali murojaat qiladi.

37. Qayta rasmiylashtirishda to‘lanadigan yig‘im summasining:

a) Markazga o‘zi kelib murojaat etganda:

20 foizi — O‘zbekiston Respublikasi Adliya vazirligi huzuridagi Davlat xizmatlari agentligi budjetdan tashqari jamg‘armasining shaxsiy hisobvarag‘iga;

qolgan mablag‘lar litsenziyalovchi organning hisobvarag‘iga;

b) YIDXP orqali murojaat etilganda:

10 foizi — O‘zbekiston Respublikasi Adliya vazirligi huzuridagi Davlat xizmatlari agentligi budjetdan tashqari jamg‘armasining shaxsiy hisobvarag‘iga;

11,25 foizi — Axborot-kommunikatsiya texnologiyalarini rivojlantirish jamg‘armasining elektron hukumat va raqamli iqtisodiyotning idoralararo loyihalarini moliyalashtirish bo‘yicha maxsus hisobvarag‘iga;

qolgan mablag‘lar litsenziyalovchi organning hisobvarag‘iga o‘tkaziladi.

7-bob. Litsenziya talablari va shartlariga rioya etilishini nazorat qilish

38. Litsenziat tomonidan litsenziya talablari va shartlariga rioya etilishi qonun hujjatlarida belgilangan tartibda litsenziyalovchi organ tomonidan nazorat qilinadi.

39. Litsenziya talablari va shartlariga rioya etilishini nazorat qilishda litsenziyalovchi organ o‘z vakolatlari doirasida quyidagi huquqlarga ega:

litsenziat tomonidan litsenziya talablari va shartlariga rioya etilishini qonun hujjatlarida belgilangan tartibda rejali tekshirish;

litsenziya talablari va shartlari litsenziat tomonidan buzilganligidan dalolat beruvchi hollar mavjud bo‘lgan taqdirda, litsenziat litsenziya talablari va shartlariga rioya etishini qonun hujjatlarida belgilangan tartibda rejadan tashqari tekshirish;

litsenziya talablari va shartlariga rioya etilishini tekshirish chog‘ida paydo bo‘ladigan masalalar bo‘yicha litsenziatdan zarur axborotni belgilangan tartibda so‘rash va olish;

tekshirishlar natijalari asosida litsenziya talablari va shartlarining aniq buzilishlarini ko‘rsatgan holda dalolatnomalar (ma’lumotnomalar) tuzish;

litsenziatga aniqlangan buzilishlarini bartaraf etish majburiyatini yuklovchi qarorlar chiqarish, bunday buzilishlarni bartaraf etishga majbur bo‘lgan muddatlarni belgilash;

litsenziyaning amal qilishini to‘xtatib turish, tugatish yoki litsenziyani bekor qilish to‘g‘risida qonun hujjatlarida belgilangan tartibda qaror chiqarish yoki sudga murojaat qilish;

xo‘jalik yurituvchi subyektlar tomonidan veterinariya faoliyatini litsenziyasiz amalga oshirish hollari aniqlangan taqdirda, materiallarni qonun hujjatlarida belgilangan choralar ko‘rish uchun belgilangan tartibda soliq organlariga yuborish.

40. Litsenziya talablari va shartlariga rioya etilishini tekshirishda litsenziyalovchi organ xodimlari tomonidan ikki nusxada dalolatnoma tuziladi, ularning bittasi litsenziatga beriladi, ikkinchi nusxasi litsenziyalovchi organda qoladi.

8-bob. Litsenziyaning amal qilishini to‘xtatib turish, tugatish, litsenziyani bekor qilish

41. Litsenziyaning amal qilishini to‘xtatib turish va tugatish, uni bekor qilish “Faoliyatning ayrim turlarini litsenziyalash to‘g‘risida”gi O‘zbekiston Respublikasi Qonunining 22 — 24-moddalarida nazarda tutilgan hollarda va tartibda amalga oshiriladi.

Litsenziat Markaz yoki YIDXP orqali 7-ilovaga muvofiq amal qilishni tugatish yoki bekor qilish to‘g‘risida ariza taqdim etadi.

Litsenziyalovchi organning litsenziyaning amal qilishini to‘xtatib turish va tugatish, uni bekor qilish to‘g‘risidagi qarori yuzasidan sudga shikoyat qilinishi mumkin. Litsenziyalovchi organ qarori asossiz ekanligi sud tomonidan e’tirof etilgan taqdirda, litsenziyalovchi organ litsenziat oldida litsenziat ko‘rgan zarar miqdorida javob beradi.

9-bob. Litsenziyalar reyestri

42. Litsenziyalovchi organ litsenziyalar reyestrini yuritadi. Veterinariya faoliyatini amalga oshirishga litsenziyalar reyestri yuridik va jismoniy shaxslar uchun alohida yuritiladi. 

Litsenziyalar reyestrida quyidagilar ko‘rsatiladi:

a) litsenziatlar to‘g‘risidagi asosiy ma’lumotlar:

yuridik shaxslar uchun — tashkilotning nomi va soliq to‘lovchining identifikatsiya raqami, mulkchilik shakli, filiallar to‘g‘risida ma’lumotlar, tashkilot rahbarining familiyasi, ismi, otasining ismi;

jismoniy shaxslar uchun — litsenziatning familiyasi, ismi, otasining ismi, uning pasporti ma’lumotlari, yashash manzili, telefoni;

b) litsenziyaning berilgan sanasi va tartib raqami;

v) litsenziya blankasining seriyasi va tartib raqami;

d) veterinariya faoliyati yo‘nalishi;

e) litsenziyalanadigan faoliyat amalga oshiriladigan manzil, ish telefoni, faks;

j) litsenziyani qayta rasmiylashtirish, uning amal qilish muddatini to‘xtatib turish va tiklashning asoslari va sanasi;

z) litsenziyaning amal qilishini to‘xtatish yoki litsenziyani bekor qilishning asoslari va sanasi.

43. Litsenziyalar reyestrida mavjud bo‘lgan ma’lumotlar litsenziyalovchi organning veb-saytiga joylashtiriladi va tanishib chiqish uchun ochiq bo‘ladi.

10-bob. Litsenziya berilganligi uchun davlat boji

44. Litsenziya berilganligi uchun bazaviy hisoblash miqdorining o‘n baravari miqdorida davlat boji undiriladi.

45. Davlat boji summasining:

a) Markazga o‘zi kelib murojaat etganda:

20 foizi — O‘zbekiston Respublikasi Adliya vazirligi huzuridagi Davlat xizmatlari agentligi budjetdan tashqari jamg‘armasining shaxsiy hisobvarag‘iga;

qolgan mablag‘lar respublika budjetiga;

b) YIDXP orqali murojaat etilganda:

10 foizi — O‘zbekiston Respublikasi Adliya vazirligi huzuridagi Davlat xizmatlari agentligi budjetdan tashqari jamg‘armasining shaxsiy hisobvarag‘iga;

11,25 foizi — Axborot-kommunikatsiya texnologiyalarini rivojlantirish jamg‘armasining elektron hukumat va raqamli iqtisodiyotning idoralararo loyihalarini moliyalashtirish bo‘yicha maxsus hisobvarag‘iga;

qolgan mablag‘lar respublika budjetiga o‘tkaziladi.

11-bob. Yakunlovchi qoidalar

46. Markaz va litsenziyalovchi organ o‘z faoliyatini amalga oshirishi natijasida olingan ma’lumotlarning sir saqlanishini ta’minlaydi.

47. O‘zbekiston Respublikasi Adliya vazirligi huzuridagi Davlat xizmatlari agentligi, uning hududiy boshqarmalari va Markaz ushbu Reglament talablari ijrosi bo‘yicha davlat organlari va boshqa tashkilotlarning faoliyati yuzasidan, shu jumladan YIDXP orqali doimiy nazoratni amalga oshiradi va monitoring olib boradi.

48. Ariza beruvchilar davlat organlari va boshqa tashkilotlar xodimlarining xatti-harakatlari yuzasidan qonun hujjatlarida belgilangan tartibda shikoyat qilishlari mumkin.

49. Mazkur Reglament talablarining buzilishida aybdor bo‘lgan shaxslar qonun hujjatlarida belgilangan tartibda javob beradilar.

Veterinariya faoliyatini litsenziyalash bo‘yicha davlat xizmatlarini ko‘rsatishning ma’muriy reglamentiga
 1-ILOVA

Markaz yoki YIDXP orqali veterinariya faoliyatini litsenziyalash

SXEMASI

Veterinariya faoliyatini litsenziyalash bo‘yicha davlat xizmatlarini ko‘rsatishning ma’muriy reglamentiga
 2-ILOVA

Veterinariya faoliyatining quyidagi yo‘nalishlariga litsenziya berish bo‘yicha davlat xizmatlaridan foydalanish uchun

Ariza

Veterinariya faoliyatini litsenziyalash bo‘yicha davlat xizmatlarini ko‘rsatishning ma’muriy reglamentiga
 3-ILOVA

Veterinariya faoliyatining quyidagi yo‘nalishlariga filial ochish bo‘yicha davlat xizmatlaridan foydalanish uchun

Ariza

Veterinariya faoliyatini litsenziyalash bo‘yicha davlat xizmatlarini ko‘rsatishning ma’muriy reglamentiga
 4-ILOVA

Veterinariya faoliyatining quyidagi yo‘nalishlariga litsenziat o‘zgartirilganda, uning nomi yoki joylashgan joyini (pochta manzilini) o‘zgartirish bo‘yicha davlat xizmatlaridan foydalanish uchun

Ariza

Veterinariya faoliyatini litsenziyalash bo‘yicha davlat xizmatlarini ko‘rsatishning ma’muriy reglamentiga
 5-ILOVA

Veterinariya faoliyatining quyidagi yo‘nalishlariga litsenziatning familiyasi, ismi, otasining ismi yoki yashash joyi o‘zgartirish bo‘yicha davlat xizmatlaridan foydalanish uchun

Ariza

Veterinariya faoliyatini litsenziyalash bo‘yicha davlat xizmatlarini ko‘rsatishning ma’muriy reglamentiga
 6-ILOVA

Veterinariya faoliyatining quyidagi yo‘nalishlariga qayta rasmiylashtirish (litsenziyaning amal qilishini, faoliyat turining bir qismini (qismlari) to‘xtatish) bo‘yicha davlat xizmatlaridan foydalanish uchun

Ariza

Veterinariya faoliyatini litsenziyalash bo‘yicha davlat xizmatlarini ko‘rsatishning ma’muriy reglamentiga
 7-ILOVA

Veterinariya faoliyatining quyidagi yo‘nalishlariga litsenziyaning amal qilishni tugatish yoki bekor qilish bo‘yicha davlat xizmatlaridan foydalanish uchun

Ariza

Vazirlar Mahkamasining 2020-yil 23-maydagi 328-son qaroriga
 2-ILOVA

O‘zbekiston Respublikasi Hukumatining o‘z kuchini yo‘qotgan deb e’tirof etilayotgan ayrim qarorlari

RO‘YXATI

1. Vazirlar Mahkamasining “Veterinariya faoliyatini litsenziyalash to‘g‘risidagi nizomni tasdiqlash haqida” 2003-yil 3-noyabrdagi 479-son qarori. 

2. Vazirlar Mahkamasining “O‘zbekiston Respublikasi Hukumatining ayrim qarorlariga o‘zgartirish va qo‘shimchalar kiritish to‘g‘risida (O‘zbekiston Respublikasi Prezidentining “Tadbirkorlik faoliyati yuritish uchun ruxsatnoma turlarini qisqartirish va ularni berish tartib-qoidalarini soddalashtirish to‘g‘risida” 2005-yil 21-sentabrdagi PQ-186-son qarori)” 2006-yil 22-maydagi 92-son qaroriga ilovaning 29-bandi. 

3. Vazirlar Mahkamasining “O‘zbekiston Respublikasi Hukumatining ayrim qarorlariga o‘zgartirish va qo‘shimchalar kiritish, shuningdek ba’zilarini o‘z kuchini yo‘qotgan deb hisoblash to‘g‘risida (O‘zbekiston Respublikasining “Tadbirkorlik subyektlarini huquqiy himoya qilish tizimi takomillashtirilganligi hamda ularning moliyaviy javobgarligi erkinlashtirilganligi munosabati bilan O‘zbekiston Respublikasining ayrim qonun hujjatlariga o‘zgartirish va qo‘shimchalar kiritish to‘g‘risida” 2006-yil 10-oktabrdagi O‘RQ-59-son qonuni)” 2006-yil 10-noyabrdagi 235-son qaroriga 1-ilovaning 51-bandi. 

4. Vazirlar Mahkamasining “O‘zbekiston Respublikasi Hukumatining ayrim qarorlariga o‘zgartirish va qo‘shimchalar kiritish to‘g‘risida (O‘zbekiston Respublikasining “Faoliyatning ayrim turlarini litsenziyalash to‘g‘risida”gi O‘zbekiston Respublikasi Qonuniga o‘zgartish va qo‘shimchalar kiritish haqida” 2011-yil 7-sentabrdagi O‘RQ-292-son qonuni)” 2012-yil 1-fevraldagi 26-son qaroriga ilovaning 14-bandi.

5. Vazirlar Mahkamasining “O‘zbekiston Respublikasi Hukumatining ayrim qarorlariga o‘zgartirish va qo‘shimchalar kiritish, shuningdek ba’zilarini o‘z kuchini yo‘qotgan deb hisoblash to‘g‘risida (O‘zbekiston Respublikasi Prezidentining “Statistik, soliq va moliyaviy hisobotlarni, litsenziyalanadigan faoliyat turlarini va ruxsat berish tartib-taomillarini tubdan qisqartirish chora-tadbirlari to‘g‘risida” 2012-yil 16-iyuldagi PF-4453-son Farmoni)” 2012-yil 1-noyabrdagi 313-son qaroriga 1-ilovaning 45-bandi. 

6. Vazirlar Mahkamasining “Veterinariya faoliyatini litsenziyalash to‘g‘risidagi nizomga o‘zgartirish va qo‘shimchalar kiritish haqida” 2018-yil 28-iyuldagi 590-son qarori. 

7. Vazirlar Mahkamasining “O‘zbekiston Respublikasi Hukumatining ayrim qarorlariga o‘zgartirishlar va qo‘shimchalar kiritish to‘g‘risida (O‘zbekiston Respublikasining “O‘zbekiston Respublikasining ayrim qonun hujjatlariga o‘zgartish va qo‘shimchalar kiritish to‘g‘risida” 2017-yil 18-apreldagi O‘RQ-429-son qonuni va O‘zbekiston Respublikasi Prezidentining “Tadbirkorlik faoliyati sohasidagi litsenziyalash va ruxsat berish tartib-taomillarini yanada qisqartirish va soddalashtirish, shuningdek, biznes yuritish shart-sharoitlarini yaxshilash chora-tadbirlari to‘g‘risida” 2018-yil 11-apreldagi PF-5409-son Farmoni)” 2018-yil 29-oktabrdagi 884-son qaroriga ilovaning 11-bandi. 

8. Vazirlar Mahkamasining “O‘zbekiston Respublikasi Veterinariya va chorvachilikni rivojlantirish davlat qo‘mitasi faoliyatini tartibga soluvchi normativ-huquqiy hujjatlarni tasdiqlash to‘g‘risida” 2019-yil 27-iyundagi 532-son qaroriga 5-ilovaning 6-bandi. 

9. Vazirlar Mahkamasining “O‘zbekiston Respublikasi Hukumatining ayrim qarorlariga o‘zgartirishlar kiritish to‘g‘risida (O‘zbekiston Respublikasi Prezidentining “Mehnatga haq to‘lash, pensiyalar va boshqa to‘lovlar miqdorlarini aniqlash tartibini takomillashtirish to‘g‘risida” 2019-yil 21-maydagi PF-5723-son Farmoni)” 2019-yil 28-dekabrdagi 1046-son qaroriga ilovaning 44-bandi.

   (Qonun hujjatlari ma’lumotlari milliy bazasi, 23.05.2020-y., 09/20/328/0652-son)